Sorsogon City - FULL force na nag-atendir an opisyales asin miembros kan Sorsogon City Chamber of Commerce and Industry sa public dialogue na pinagpaapod kan lokal na gobyerno para isihon an epekto kan dry run sa sistema kan trapiko digdi sa syudad nin Sorsogon.
Nagpaluwas nin komento an mga ini manongod sa naging epekto sa saindang negosyo kan traffic dry run. Enot an loading sa hampang kan mga establisimiento na pirming nasisita kan mga traffic enforcer asin pulis. Pighagad ninda na togotan nin horohalawig na panahon an saindang mga parokyano ta imbis maglaog asin magbakal sa saindang puesto, dae na sana para dae na masita. Panduwa, an parking zone na kun puede iguang idesignar na mas horoharane sa mga negosyo. Pantolo an truck ban na ideretso poon alas nuebe (9) an aga sagkod alas tres (3) an hapon para dae na maghalat pa an mga supplier kan saindang produkto. Gabos naman ipigpabugtak sa rekord ni City Administrator Ireneo Manaois an nasambit na mga obserbasyon asin suhestyon para sa finalization kan traffic scheme. Ipinaotob an dry run poon Agosto 15, 2012 makalihis magbukas an Integrated Terminal sa Barangay kan Balogo. Sinabi ni Manaois, importante an arug kaining pagbinalyuhan nin obserbasyon para makapagtogdas nin mas maninigo na mga sistema. Nakiolay pa man an Sorsogon Chamber na kun puede tawan sinda nin separadong oras na maipaabot nin bisay an iba pa nindang mga agrangay. #
No comments:
Post a Comment