DOH Sorsogon alertado kontra Dengue

Sorsogon City - VIRAL Encephalitis an causa kan kagadanon kan sarong 11 anyos na aki sa Seabreeze Homes, Cabid-an East district Sorsogon City. Ini an paglilinaw kan Department of Health, Provincial Health team kan Sorsogon na pinamamayuhan ni Dr. Napoleon Arevalo. Sinabi ni Dr. Arevalo na sa miting ninda asin kan City Health Office, plinano na kan grupo kun pan-o an epektibong pagrespondir sa padagos na naererehistrong mga kaso nin Dengue sa Seabreeze Homes. Sinabi ni Dr. Arevalo na padagos pigbabantayan kan City Health asin maging kan saindang oficina an nasambit na lugar como digdi halangkaw an bilang kan mga clinical dengue cases. Mientrastanto, segun pa sa Doktor nagpadara na sinda nin sample para sa laboratory test kan panibagong mortality na nagbotwa sa Seabreeze Homes para macomfirmar kun anong virus man nanggad an causa kan pagkagadan kan aki. Sinabi ni Arevalo, an DOH Manila an may kakayahan magcomfirmar kun anong specificong virus an nakaulakit sa sarong indibidwal. Nagpatanid na man siya sa namamanwaan na manteniron an pag-observar sa inaapod nindang intervention laban sa Dengue, na iyo an 4S. Ini kinabibilangan kan search and destroy; self protection measure; seek early consultation; and say No to indiscriminate fogging. #