Intensity 6 kan linog namatean digdi sa Sorsogon gikan sa magnitude 7.7 na linog na tuminama sa ESE kan Borongan Eastern Samar.

Sorsogon City - YINOGYOG nin magnitude 7.7 na linog an Pilipinas kasubanggi. 

Segun sa Philippine Institute of Volcanology and Seismology o PHIVOLCS yaon sa 161km ESE kan Borongan Eastern Samar an epicenter kan linog kun saen namatean man digdi sa probinsya nin Sorsogon an maabot sa intensity 6 na pagyogyog pasado alas 8:30 an pagkabanggi. 

Nangarat an gabos na mga apektado kan linog dahilan sa kosog kan pagyogyog na nagdurar nin sobra halos tres minutos. 

Mantang dae man nagkaigua nin danyos digdi sa Sorsogon alagad tolos nag-alerto an mga awtoridad sa posibling paghagad nin asistensya kan sa namamanwaan. 

Segun sa PDRRMC kumpiado sindang mas naging preparado an tawo dahilan sa mga pinaggibong earthquake drill poon pa kan nakalihis na mga panahon na syertong naggamit mientras na naglilinog.  

Mantang an mga Barangay natawan na nin supisyenteng kaaraman kun pan-o aaktuwaran an kaparehong kalamidad. 

Tolos man nagpaluwas nin Tsunami alert an PHIVOLS sa mga lugar na yaon sa eastern seaboard kan nasyon kabilang an Northern asin Eastern Samar, Leyte, southern Leyte, Surigao del Sur asin Surigao del Norte.#